विश्वासिलो बचत तथा ऋण सहकारी संस्था लि. २०५२/०२/३ मा दर्ता भई “सदस्यको संस्था” भन्ने नाराका साथ २०५६ सालबाट क्रियाशिल भएको सहकारी संस्था हो । प्रारम्भमा २८ जना सदस्यबाट रु.१०० का दरले शेयर संकलन गरि ठाकुरद्वारा गा.वि.स. वडा नं. २ र ६ मा केन्द्रित भै सदस्यहरूमा बचत गर्ने बानीको विकास गराउने उद्देश्यले थोरै सदस्यहरुबाट शुरुवात भएको संस्था हो । सदस्यहरुको आर्थिक, सामाजिक र साँस्कृतिक उत्थानमा जोड दिँदै आएको यस संस्थाले नेपाल बचत तथा ऋण केन्द्रीय सहकारी संघ लि. (नेफ्स्कून) र राष्ट्रिय सहकारी बैंकमा आवद्ध भए पश्चात सहकारी क्षेत्रमा आफ्नो छुट्टै पहिचान कायम गर्न सफल भएको हो । २०६३ सालमा ५० औँ राष्ट्रिय सहकारी दिवसको अवसरमा राष्ट्रिय सहकारी संघले संस्थालाई उत्कृष्ट सहकारी व्यवसाय पुरुस्कार प्रदान गरेको थियो । २०५८ सालमा नेपाल राष्ट्र बैंकको ग्रामिण स्वावलम्बन कोषबाट सौलियत कर्जा लिई सदस्यहरुलाई उद्यमशिलताका लागि प्रोत्सानको सुरुवात गरेको यस संस्थाले समुदायमा रहेका विपन्न, सुकुम्बासि तथा मुक्तकमैयमा बस्तिमा संस्थाले कर्जा प्रवाह गर्न २०६४ सालमा RMDC (रुरल माईक्रोफाईनान्स डेभलपमेन्ट सेन्टर) संग कर्जा सम्झौता गरी सो संस्थाको प्राविधिक तथा आर्थिक सहयोगमा लघुविक्त कार्यत्रम सुरु गरेको थियो । उक्त कार्यत्रमका मार्फतबाट संस्थाले आफ्ना सदस्यहरूलाई सरल र सुलभ रूपमा वित्तिय सेवा तथा आर्थिक सुरक्षा कार्यत्रम अन्तर्गत विभिन्न प्रकारका सुविधाहरू प्रदान गर्न थालेको हो ।  संस्थाले विभिन्न समयमा डिभिजन सहकारी कार्यालय बर्दियाबाट कार्यक्षेत्र विस्तार गर्दै साविकको बर्दिया जिल्लाका ३१ वटा गा.वि.स र एउटा नगरपालिका मध्ये ८ वटा गा.वि.स.मा सेवा दिदै आएकोमा राज्यको पुनः संरचना पश्चात लुम्बिनी प्रदेश सरकार, भुमि व्यवस्था, कृषि तथा सहकारी मन्त्रालयबाट मिति २०७८।०१।१५ मा स्वीकृती लिई बर्दिया जिल्लाका सबै स्थानिय तहहरुमा केन्द्रिय कार्यालय सहित १८ वटा सेवा केन्द्रबाट सेवा प्रदान गर्ने गरिएको थियो । यसै गरि ठाकुरबाबा न.पा.को वडा नं.३ मा रहेको खुटासा महिला कृषि सहकारी संस्था लि., वडा नं. ६ मा रहको संगिनी महिला कृषि सहकारी संस्था लि.र वडा नं.९ मा रहेको आशिरबाद महिला कृषि सहकारी संस्था लि.संग मिति २०७६।०६।३० मा, बारबर्दिया न.पा.को वडा नं.६ मा रहेको निगरानी महिला कृषि सहकारी संस्था लि., वडा नं.१० मा रहेको दिया महिला कृषि सहकारी संस्था लि.र मधुवन न.पा. को वडा नं. १ मा रहेको पारिजात महिला कृषि सहकारी संस्था लि.संग मिति २०७९।०१।०४ मा र बाँसगढी न.पा.को वडा नं. ८ मा रहेको हार्दिक महिला कृषि सहकारी संस्था लि. र गेरुवा गा.पा.को वडा नं. ६ मा रहेको मिर्मिरे कृषि सहकारी संस्था लि. संग मिति २०८०।०१।१४ मा एकिकरण गरि संस्थाले १९ वटा सेवा केन्द्र मार्फत सेवा प्रदान गर्दै आएको छ । यसै गरी लुम्बिनी प्रदेश सरकार, आन्तरिक मामिला, कानुन तथा सहकारी मन्त्रालय, दर्ता अधिकारीको कार्यालय दाङबाट मिति २०८०।०१।२५ विनियम शंसोधन स्वीकृत गरि बर्दिया जिल्लाका सबै स्थानिय तह र बाँके जिल्लाका बैजनाथ गाउपालिका, कोहलपुर नगरपालिका र नेपालगन्ज उपमहानगरपालिकामा संस्थाले सेवा प्रदान गर्दै आई रहेको छ ।

यस संस्थाले आफ्नो व्यवसायिकता र गुणस्तरीयता कायम गर्न प्रोवेशन कार्यक्रममा सहभागी हुदै नगरपालिका, जिल्ला तथा राष्ट्रिय स्तरका विभिन्न पुरस्कार, सम्मान प्राप्त गर्न सफल भएको छ । संस्थाको सफलतामा सहकारी विभाग, प्रदेश, नेफ्स्कून, राष्ट्रिय सहकारी महासंघको महत्वपूर्ण भूमिका रहनुका साथै राष्ट्रिय सहकारी बैंक लि., जिल्ला सहकारी संघ लि. बर्दिया र माछापुच्छ्रे जिल्ला बचत तथा ऋण सहकारी संघ लि. लगायत सहकारी अभियानका विभिन्न संघ संस्थाहरूबाट नियमित सहयोग रहँदै आएको छ । राष्ट्रिय पुरस्कार र सम्मान मार्फत आफ्नो छुट्टै पहिचान बनाउन सफल भएको यो संस्था समुदाय र सदस्य मैत्री सेवा सुविधालाई नै मुख्य उद्देश्य बनाई निरन्तर अघि बढिरहेको छ । केहि सिमित मानिसहरूबाट शुरु गरिएको विश्वासिलो साकोसको वित्तीय यात्रा आजको २०८१ असार मसान्तसम्म आइपुग्दा २१,००० जना भन्दा बढी सदस्यहरुको साझा छहारीको रुपमा विकसित भईसकेको छ । गुणस्तरीय, सुलभ र प्रविधियुक्त सेवामार्फत प्रदेशकै समुच्च आर्थिक, सामाजिक, साँस्कृतिक र पर्यावरणीय विकासमा संस्था सदैव कृयाशील रहन प्रतिवद्ध छ ।